ខ្មែរ ប៊ែវើរីជីស រចនាសំបកកំប៉ុងថ្មីចំនួន៣ក្នុងពេលតែមួយសម្រាប់អបអររដូវកាលចូលឆ្នាំថ្មីប្រពៃណីខ្មែរ 

ដើម្បីអបអររដូវកាលចូលឆ្នាំថ្មីប្រពៃណីជាតិខ្មែរដែលនឹងចូលមកដល់នាពេលខាងមុខនេះ ក្រុមហ៊ុន ខ្មែរ ប៊ែវើរីជីស បានរចនាសំបកកំប៉ុងថ្មីចំនួន៣ក្នុងពេលតែមួយដែលក្នុងនោះរួមមាន សំបកកំប៉ុងស្រាបៀរ កម្ពុជា សំបកកំប៉ុងភេសជ្ជៈប៉ូវកម្លាំង វើក WURKZ ព្រមទាំងសំបកកំប៉ុង និងដបទឹកក្រូចអាយស៍ IZE កូឡា។

អ្នកស្រីគង់ កុសល នាយិកាទីផ្សារក្រុមហ៊ុន ខ្មែរ ប៊ែវើរីជីស បានមានប្រសាសន៍ថា៖ «ការរចនាសំបកកំប៉ុងថ្មីទាំងអស់នេះ គឺបង្ហាញអំពីទិដ្ឋភាពនៃការអបអរ និងការសប្បាយរីករាយដែលពលរដ្ឋខ្មែរទទួលបាននារដូវចូលឆ្នាំខ្មែរ»។

អ្នកស្រីឲ្យដឹងទៀតថា សំបកកំប៉ុងថ្មីនេះទៀតសោតនឹងធ្វើឲ្យអតិថិជនប្លែកភ្នែកប្លែកអារម្មណ៍ដោយសារការរចនានីមួយៗ មានបញ្ចូលគំនូរសំខាន់ៗដូចជា ល្បែងប្រជាប្រិយខ្មែរ ​របាំ​ត្រុដិ និងគំនូរផ្សេងៗទៀតដូចជាកាំជ្រួច ឈូង ​កន្សែង ផ្ការំដួល គោមផ្កាយ និងអមជាមួយពាក្យ «សួស្តីឆ្នាំថ្មី»។